पुणे : ‘आपली मुले शिकली पाहिजेत. त्यासाठी त्यांनी वाचले पाहिजे. जिजाऊ ग्रंथालयाने जी संधी उपलब्ध करून दिली आहे त्याचा फायदा मुलांनी घ्यावा. मुले शिकली, तरच आपण करत असलेले काम त्यांच्या हातून सुटेल व ती चांगल्या हुद्द्यावर काम करतील,’ असे प्रतिपादन पुण्याचे उपमहापौर डॉ. सिद्धार्थ धेंडे यांनी केले.
शिवस्फूर्ती प्रतिष्ठान व जिजाऊ ग्रंथालय आयोजित जिजाऊ ग्रंथालय वर्धापनदिनानिमित्त वाचक मेळावा व पुणे मनपा सफाई कामगारांचा दिवाळीनिमित्त सत्कार समारंभ धनत्रयोदशी दिनी (पाच नोव्हेंबर) झाला. त्यावेळी ते बोलत होते. या वेळी उपायुक्त ज्ञानेश्वर मोळक, चित्रलेखाचे संपादक ज्ञानेश महाराव, कस्तुरबा सोसायटीचे सेक्रेटरी विष्णू आगरवाल, संचालक अनिल यादव, जिजाऊ ग्रंथालय कार्यवाह नूतन चिंचणे, खजिनदार शैलेश मोळक, सदस्य शिल्पकला रंधवे, कैलास वडघुले, कांचन जुन्नरकर, मैथिली मोळक, वर्षा माळवदे, छाया सातभाई आदी मान्यवर उपस्थित होते.
आपले रियल हिरो सफाई कामगार.. करूया त्यांचा सन्मान’ या हेतूने गेल्या सहा वर्षांपासून हा उपक्रम शिवस्फूर्ती प्रतिष्ठान व जिजाऊ ग्रंथालय राबवत आहे. महिलांना साडी-चोळी, तर पुरुष कर्मचाऱ्यांना शर्ट-पॅंटपीस व दिवाळी फराळाचे वाटप करून प्रतिवर्षी कृतज्ञता व्यक्त केली जाते. या वर्षी सुमारे ६५ कामगारांचा सत्कार करण्यात आला.
डॉ. धेंडे म्हणाले, ‘डॉ. बाबासाहेब आंबेडकर, महात्मा फुले, क्रांतीज्योती सावित्रीबाई फुले यांच्यामुळे बहुजनांची स्थिती बदलू लागली. इतर गोष्टीत गुंतण्यापेक्षा यांचे विचार आपण वाचले पाहिजेत.’
प्रारंभी पूर्वल खरात यांनी ‘कामगारांचे जीवन’ या विषयावर कविता सादर केली. सर्व उपस्थितांनी कवितेला दाद दिली. या वेळी स्वराज चॉकलेटचे संचालक अनिल ढगे यांनी सर्व कामगारांना चॉकलेटचे वाटप केले. ॲड. शैलजा मोळक यांनी संस्थेच्या सर्व उपक्रमांची माहिती देऊन कार्यक्रमाचे प्रास्ताविक केले. सूत्रसंचालन प्रज्ञेश मोळक यांनी केले. कैलास वडघुले यांनी आभार मानले.